قصيدة يومية منزل | باسم الكربلائي | ليلة ٢ محرم ١٤٤٣ | مجالس العزاء | مكتوبة

١٤٤٣ , ٢ , ليلة , مجالس , محرم , منزل , مكتوبة , العزاء , الكربلائي , باسم , يومية , قصيدة

قصيدة يومية منزل | باسم الكربلائي | ليلة ٢ محرم ١٤٤٣ | مجالس العزاء | مكتوبة

📜قصيدة : يومية منزل
✒️للشاعر : ميرزا عادل اشكناني
📅: ليلة 2 محرم 1443 هـ
🕌: هيئة جواد الأئمة ع موكب شهداء الحشد الشعبي


يومية منزل بيْه ينزِل و آنا ويَّاه
منِّ المدينه لأربعينه اشلون مسراه
خطوه ابأثر خطوه اويْه النَّحر
يطوي محطَّاته ابهالسفر
و أنا ويَّاه
⬛️◾️⬛️◾️⬛️
أنا الزهره اْو عله اوْليدي
يوِن گلبي ولا يگطع ونينه
عليْه اتفـيض حنِّيتي
حِنينه اْو منهو مثْل الأُم حِنينه
إجه ايودَّعني و ايسافر
يريد ايشيل من أرض المدينه
نفَضت اترابي من رُوحي
اطْلعت من گبري أمشي اويه الظعينه
إيدي اعْله گلبي او صار دربي ويَّه لظعون
اْو عندي خبرهم من سفرهم ما يرجعون
ظعنه مِشه بدروب الخطَر
يطوي محطَّاته ابهالسفر
و أنا ويَّاه
⬛️◾️⬛️◾️⬛️
يگولون اليطب مكَّه
أمان اتصير إله امْن الخطر والخوف
و أنا ابني من وصل ليها
عليْه دارت هَنادي او بيض لسيوف
گالوْا ينهدر دمَّه
ولَوْ بالكعبه چان ايصلّي و ايْطوف
حوّل حِجّته عُمره
او طلع يطوي المنازل لرْض لطفوف
إِحْرامه حَلَّه اْو دمْعه هَلَّه او لاح لفراگ
و ابدربه وضَّح حجَّه يصبَح حجّ لعراگ
ناوي على ذاك المُستقَر
يطوي محطَّاته ابهالسفر
و أنا ويَّاه
⬛️◾️⬛️◾️⬛️
نوَّخ ظعنه برْض الطف
او شفِت ذَبحة بنينه او هَـلَه او ناسه
او حِبَسْت أنفاسي بالمصرَع
لمَن شفِت الولَد گطعَوْا أنفاسه
زادت حيرتي حيره
واشوفن بن سعَد بالخيل داسه
أظل وي جسمهِ لمسلَّب !؟
لو كمّل سفرتي ويَّه راسه ؟!
قرّرت أوَدعه او گلْت أتبعه لراس لحسين
ابسفرة مناحِر من يسافر يستقر وين ؟
يصعد جبل لو يعبر نهَر
يطوي محطَّاته ابهالسفر
و أنا ويَّاه
⬛️◾️⬛️◾️⬛️
جماله اعله الرمح يبهر
گمر اربعطعش تمِّ ابْطَلِعْـته
طلع من كربله وآنه
إلى مسجد الحَنَّانه تِبَعْـته
او بس شاف إخته مچتوفه
من فوگ الرّمح طاحت دمِعْته
يوصّي زينب ابسكنه
او صوته امن النحر يطلع سِمَعْته
يبچي لخواته ولبناته گلبه محروگ
و اهْوَه اِعْله رُمحه چان جَرحه يحدي بالنوگ
ويّاهن لچم منزل عُبَر
يطوي محطَّاته ابهالسفر
و أنا ويَّاه
⬛️◾️⬛️◾️⬛️
وصلنه لمنزل الكوفه
او عقيق اعيوني صَب لؤلؤه المنثور
بناتي باليُسر باتَن
و ابني دَم وريده اعْليهِـن ايْفُور
من چف مجرم لـ مجرِم
راسه المنگطع ينتقِل و ايْدُور
مرَّه اعْله الرُمح عالي
اْو مرَّه ابّيت خُولي ابوَسَط تُّنور
من خَد محمَّد تالي هالخَـد فوگ لِرمادْ
گلبي اشيصبره و إبني نحره ويْ بَني ازياد
صار النحَر بچفوف القَدر
يطوي محطَّاته ابهالسفر
و أنا ويَّاه
⬛️◾️⬛️◾️⬛️
من تِكريت للموصل
عبَر للشام راسه يطوي لدروب
يوم ابصوْمَعة راهِب
او يوم ابْعَسْقَلان ابشِجره مصلوب
وابَّـوَّابة الساعات
شفِت منظر يفطّر صُمِّ لگلوب
شفِت راس البطل مُسلِم
على مَدْخَل دِمَشْق ابرمح منصوب
شاف اِبن عمَّه إجه اِيضمّه وهوَّه منحور
و إنحنه راسه ابشوگ باسه امشابگ انحور
چنَّه شمس شابگله گمَر
يطوي محطَّاته ابهالسفر
و أنا ويَّاه
⬛️◾️⬛️◾️⬛️
أشد منزل هدم حيلي
نِزلنه اْو نِزلتِ اعْلينه البِلِيَّه
آهْ يالشام آهْ يالشام
آهْ يالشام أصعبهم عليَّه
اشجاب النُور للمخمور
اشجاب ابني لإبن هنْد او سميَّه
ساعه بالطشت وحده
اوساعه بالطشت بس يم رقيَّه
جاها ابخضابه او بالخرابه صار ما صار
تمسح جبينه اشگد حِنينه اچفوف لزغار
من مصرعه لْحَد خامس صَفر
يطوي محطَّاته ابهالسفر
و أنا ويَّاه
⬛️◾️⬛️◾️⬛️
خلصت سفرة المنحر
اْو رَد راسه من السفره الطويله
او عگب ما چان برماحه
أخيراً صار بچفوف العقيله
تمّيت آنه ويَّه إبني
أشيل اترابه و ابراسي أهيله
او يوم الأربعينيّه
أتلگه اليزوره و أندعيله
يوم الزياره بنتظاره الجاي مشّاي
دربه السَّلامه او بالقيامه يكون ويّاي
يوم أربعينه كلمن حظر
يطوي محطَّاته ابهالسفر
و أنا ويَّاه
⬛️◾️⬛️◾️⬛️
#اللهم_عجل_لوليك_الفرج

المصدر: منتدى محبي أهل البيت عليهم السلام - من قسم: قصائد مكتوبة

---

rwd]m d,ldm lk.g | fhsl hg;vfghzd gdgm ٢ lpvl ١٤٤٣ l[hgs hgu.hx l;j,fm